Тыа сиригэр 30-с, 40-с сылларга культурнай-сырдатар үлэ ааҕар балаҕаннарга уонна кыһыл чуумнар үлэһиттэринэн ыытыллара. Кинилэр нэһилиэнньэ ортотугар агитационнай-маассабай, культурнай-сырдатар, санитарнай-чэбдигирдэр, үөрэҕэ суохтары үөрэтии боппуруостарыгар араас өрүттээх үлэни ыытар соруктаахтара. Ол кэмҥэ анал үөрэхтээх культура үлэһиттэрэ суохтара, ааҕар балаҕаннар колхоз, сэбиэт хонтуораларыгар, оскуолаларга кыбыллан үлэлииллэрэ, хааччыллыылара мөлтөҕө.
1948 сыллаахха Төбүлэххэ сельскай кулууп аһыллыбыта, аан бастакы сэбиэдиссэйинэн Старков Гавриил Дмитриевич анаммыта.
1984 сыллаахха саҥа кулууп үлэҕэ киирбитэ. Бу кулуубу «Муома» совхоз дирекцията туттарбыта. 1985 сылтан 1995 сылга диэри кулууп директорынан Старкова Вера Никитична, худруктарынан араас сылларга Старков Андрей Петрович, Соркомова Нина Васильевна, Никулин Афанасий Иванович бэрт ситиһиилээхтик үлэлээбиттэрэ. Кинилэр үлэлиир сылларыгар оройуон таһымнаах араас самодеятельнай.фестивалларга нэһилиэк куруук бастакы миэстэни ылара. Сылын аайы гастрольнай бөлөҕүнэн нэһилиэктэринэн сылдьан концертыыллара, көрөөччүлэр биһирэбиллэрин ылаллара..
Афанасий Никулин тэрийбит «Эҕэрдэ» вокальнай инструментальнай ансамбыла «Мирный поет о мире» конкурска кыттан биһирэбили ылбыта, ол сыл Дьокуускайга ыытыллыбыт ВИАлар конкурстарыгар бастакы дипломаан буолбута. Кини оҕолорго «Дьиэрэҥкэй» синтезаторнай бөлөх тэрийбитэ, оройуоҥҥа улахан биһирэбили ылан, республикаҕа профессиональнай үөрэхтээһиннэр конкурстарыгар кыттан, дипломаан аатын ылан, телевидениеҕа уһуллар чиэскэ тиксибиттэрэ.
Сцена ветерана Алексей Егорович Слепцов дэгиттэр талааннааҕа, кини тойуксут-импровизатор, хомусчут, драматическай артыыс быһыытынан биллэрэ, көрөөччүлэр биһирэбиллэрин ылара, эдэр ыччаты угуйара. Кулууп үлэһиттэрэ маны таһынан общественнай тэрилтэлэри сүрүннээн, нэһилиэккэ культурнай-сырдатар мероприятиялары тиһигин быспакка ыыталлара. 1995-2002 сылларга кулуубка элбэх киһи үлэлээн ааста.
Нэһилиэк культурнай олоҕор айар-тутар дьоҕурдаах дьоннорбут киллэрбит кылааттара улахан. Мелодистар Афанасий Никулин, Анатолий Старков, Иннокентий Вензель ырыаларын дьон сөбүлээн ыллыыр, истэр. Олохтоох автор А.Е. Слепцов хоһооннорун, кэпсээннэрин хомуурунньугунан «Анабыл», «Чучунаа суола» диэн кинигэлэри бастакынан таһааттарбыта.
